30 верасня 2014 года споўнiлася 100 гадоў з дня нараджэння Данілы Канстанцінавіча Міцкевіча, заслужанага дзеяча культуры Беларусі, старэйшага сына народнага паэта Беларусі Якуба Коласа, арганізатара і першага (1957 -1980) дырэктара Дзяржаўнага літаратурна-мемарыяльнага музея Якуба Коласа.
24 верасня ў бібліятэцы №1 імя Л.М.Талстога адбылася прэзентацыя кнігі “І бачу пройдзеныя далі…:матэрыялы да 100-годдзя Д.К.Міцкевіча”, прысвечанай гэтай юбілейнай даце.
Данілу Канстанцінавічу лёс адмерыў 81 год цікавага, паўнавартаснага і, ў той жа час, няпростага жыцця. Хімік па прызваннi і адукацыі, пасля смерці свайго бацькі ён быў прызначаны ўрадам рэспублікі на пасаду дырэктара Літаратурнага музея песняра. Пачынаў з нуля: рабочая группа, падбор кадраў, збіральніцкая праца, стварэнне першай экспазіцыі, адкрыццё музея, пасля – яго філіялаў на Стаўбцоўшчыне.
Апошняе дзесяцігоддзе свайго жыцця Даніла Канстанцінавіч больш актыўна стаў займацца творчай працай, удзельнічаў у канферэнцыях, выступаў на розных мерапрыемствах, у друку, на радыё і па тэлебачанні.
Старонкі кнігі “І бачу пройдзеныя далі…” – гэта шэраг разнастайных, унікальных матэрыялаў, якія расказваюць пра жыццёвы і творчы шлях гэтага чалавека. Многія дакументы друкуюцца ўпершыню.
Укладальнік кнігі – яго дачка, унучка Я.Коласа Вера Данілаўна Міцкевіч.
На сустрэчу прыйшлі навукоўцы, пісьменнікі і паэты, мастакі , музыканты, супрацоўнікі Дзяржаўнага літаратурна-мемарыяльнага музея Я.Коласа, Дзяржаўнага музея гісторыі беларускай літаратуры.
Вёў вечарыну паэт Міхась Скобла. Яскравым і цікавым было выступленне мастака кнігі Валерыя Дранчука. Гучалі вершы Я.Коласа ў выкананні актрысы Галіны Дзягілевай і любімая музыка народнага паэта.
На сустрэчы таксама прысутнічаў малодшы сын Я.Коласа Міхась Міцкевіч, які цудоўна прачытаў вялікі ўрывак з паэмы “Новая зямля”, падзяліўся ўспамінамі пра бацьку і старэйшага брата. У зале прысутнічала вялікае мноства родных і сяброў сям’і Міцкевічаў.