Цэрымонія ўручэння галоўнага дакумента грамадзяніна Рэспублікі Беларусь 14-гадовым юнакам і дзяўчатам прайшла ў рамках усебеларускай акцыі ГА “БРСМ” “Мы – грамадзяне Рэспублікі Беларусь”.
20 вучняў, лепшых у сваім класе, школе, раёне, пераможцы алімпіяд, конкурсаў, спартыўных спаборніцтваў, актывісты дзіцячых і моладзевых грамадскіх аб`яднанняў, выдатнікі вучобы атрымалі пашпарты ў адміністрацыі раёна з рук главы адміністрацыі Аляксандра Крэпака, дэпутата Палаты прадстаўнікоў Нацыянальнага сходу Рэспублікі Беларусь Васіля Аляксеенка, пракурора Маскоўскага раёна г. Мінска Андрэя Панькова. У мерапрыемстве таксама прынялі ўдзел ветэраны Вялікай Айчыннай вайны Курапаценкава Інеса Герусаўна, Вусовіч Тамара Сямёнаўна, Каціла Галіна Ільінішна, прадстаўнікі раённых арганізацый грамадскіх аб`яднанняў Беларускі рэспубліканскі саюз моладзі і РГА «Белая Русь».
Адным з этапаў грамадскага станаўлення з’яўляецца ўдзел у дзейнасці разнастайных грамадскіх аб’яднанняў. Таму невыпадкова менавіта ў гэты дзень на ўрачыстым мерапрыемстве 15 юнакоў і дзяўчат уступілі ў шэрагі піянерскай арганізацыі, 10 паспяховых, творчых прадстаўнікоў моладзі атрымалі членскія білеты ГА «БРСМ». Папоўніліся 12 годнымі прадстаўнікамі шэрагі Рэспубліканскага грамадскага аб`яднання «Белая Русь».
- У нас ёсць адна вялікая каштоўнасць - наша родная Беларусь, наша непаўторная Айчына! Дзе б ні быў беларус - на сваёй зямлі ці за яе межамі, ён ганарыцца сваёй краінай. Быць грамадзянінам – гэта высокі гонар і адказнасць, як перад грамадствам, так і перад самім сабой. – адзначыў у сваім звароце да ўдзельнікаў урачыстага мерапрыемства Аляксандр Крэпак.
